ក្មួយប្រុសរបស់លោកនាយករដ្ឋមន្ត្រី ហ៊ុន សែន និងកូនប្រុសរបស់អតីតអភិបាលរាជធានីភ្នំពេញ ត្រូវបានតែងតាំងក្នុងមុខតំណែងថ្មី នេះបើយោងតាមឯកសារដែលចេញក្នុងសៀវភៅរាជកិច្ចលេខ៨៣។
លោក ហ៊ុន គឹមជាតិ ត្រូវបានតែងតាំងជាអនុប្រធាននាយកដ្ឋានកណ្ដាលនគរបាលយុត្តិធម៌ ដែលជួយដល់កិច្ចការងារក្នុងការស៊ើបអង្កេតព្រហ្មទណ្ឌ។ ការតែងតាំងនេះ ត្រូវបានធ្វើឡើងជាផ្លូវការ ក្នុងឯកសារមួយចុះហត្ថលេខាដោយលោកនាយករដ្ឋមន្ត្រី ហ៊ុន សែន នៅថ្ងៃទី១៩ ខែតុលា ឆ្នាំ២០២២ ហើយចេញជាសាធារណៈដោយទីស្តីការគណៈរដ្ឋមន្ត្រីក្នុងខែឧសភា ឆ្នាំ២០២៣។
លោក ហ៊ុន គឹមជាតិ គឺជាកូនប្រុសរបស់ ហ៊ុន សាន ដែលត្រូវជាបងប្រុសរបស់លោកនាយករដ្ឋមន្ត្រី ហ៊ុន សែន។
នៅក្នុងសៀវភៅរាជកិច្ចដដែលនេះ លោក ប៉ា វង្សសុក្រិត ក៏ត្រូវបានតែងតាំងជារដ្ឋលេខាធិការ នៃក្រសួងអភិវឌ្ឍន៍ជនបទ នេះបើតាមឯកសារមួយទៀតក្នុងរាជកិច្ចលេខ៨៣ ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៩ ខែតុលា។ លោក ប៉ា វង្សសុក្រិត គឺជាកូនប្រុសរបស់លោក ប៉ា សុជាតិវង្ស ដែលជាអតីតអភិបាលរាជធានីភ្នំពេញ និងបច្ចុប្បន្នជាតំណាងរាស្រ្តគណបក្សប្រជាជនកម្ពុជា៕
